ميك اب العوده للدوام ...
:
:
مساء الخير ..
واخيرا نزلت التدوينه
بما ان الدوامات قربت
بحكي عن الميك اب اليومي
سريع خفيف مريح للعين وماياخذ وقت
بحكي بالتفصيل وايش يناسب كل بشره
بسم الله ..
.
.
اول شي الفاونديشن ..
بالنسبه لي والافضل للبشره انك ماتستخدمين فاونديشن
الافضل بيبي كريم او سيسي كريم
لان بيكون الاستخدام بشكل يومي ومانبي شي يكتم البشره ويقفل المسام عشان ماتطلع حبوب
فا عشان بالنسبه لي هذي الثلاثه انسب شي للاستخدام اليومي ..
.
.
اول منتج هو دريم فريش بيبي كريم من ميبلين
تغطيته متوسطه
يناسب البشرات الجافه
الي بشرتها جافه تجربه وتدعي لي مره ينور الوجه يعطيه نظاره جميل للبشرات الجافه
الدهنيه او المختلطه ابدا ماراح يناسبهم
فيه حمايه من الشمس بنسبه 30
قوامه سلس مره يتوزع بسهوله
ممكن توزعينه باصابعك نفس الكريم بدون فرشه او اسفنجه
يعطي منظر طبيعي اكثر
خفيف ابدا ماتحسين انك حاطه شي
البشرات الجافه لازم يكون عندكم منه ..
تحصلونه باي صيدلية او سنتربوينت
سعره 43 ريال
.
.
.
ثاني منتج هو فاونديشن age rewind من ميبلين
انا اشوفه بيبي كريم مو فاونديشن لانه مره خفيف على انه يكون فاونديشن
مكتوب انه معالج للبقع الداكنه بالبشره
بصراحه انا مالاحظت هذا الشي
لكن الي حبيته فيه كيف يوحد اللون مايدهن
تغطيته متوسطه
يناسب البشرات المختلطه اكثر شي
فيه نسبه حمايه من الشمس
ثابت
ماهو توب لكن مو سيئ يمشي الحال لميك اب يومي
طبعا مو متوفر بالسعوديه تحصلونه اونلاين عند التاجرات
.
ثالث منتج فاونديشن hello flawless من بينفت
هذا الحب
احبه للطلعات الخفيفه زيارات سريعه
مره بططل
تغطيته خفيفه يعني الي بشرتها فيها عيوب ماراح يناسبها
فيه نسبه حمايه من الشمس
يناسب البشرات المختلطه او الدهنيه
ثابت
مايكتم البشره خفيف ع الوجه
سعره 127 من سيفورا
.
بعد الفاونديشن نجي للكونسيلر
لازم يكون خفيف ومو تغطيه عاليه عشان مايأذي المنطقه تحت العين
وتطلع تجاعيد ويزيد السواد لان تحت العين منطقه حسسااسه ورقيقه
فا اخترت كونسيلر age rewind من ميبلين
اشوف انه خفيف ومو ثقيل ولا يدخل بالبشره ويأذيها
ينور تحت العين
تغطيته متوسطه فا الي هالاتها مرررره قويه بتحتاج كوركتر قبله
بتحصلونه اونلاين عند التاجرات
.
.
نجي لاهم شي عندي بالوجه الي هي الحواجب
هي الي تبرز ملامحك وتحلي الوجه اذا عرفتي ترسمينها
طبعا الحمدلله لاحظت ان الحواجب المربعه بدت تقل
لسا فيه ناس بس مو نفس اول
فا صار فيه وعي اكثر
اخترت للحواجب منتجين على حسب كثافه الحواجب
الي حواجبها كثيره وبس تحتاج تعبيه فراغات
تشتري بودرة حواجب من بودي شوب
يجي فيها لونين غامق وفاتح الغامق تعبين فيه فراغات الي بنهاية الحاجب
والفاتح بدايه الحاجب عشان يطلع طبيعي ومريح للعين
.
الي حواجبها خفيفه تشتري جل حواجب من انستازيا بيفرلي هيلز
وترسم حاجبها فيه بس بخفه بدون ماتكثرين او تثقلين اللون عشان مايبين مزعج للعين
.
بعد كذا البلشر
ابعدي عن البلشر الي فيه لمعه او لونه برونز مثلا خلك ع الفواتح ويكون مات مافيه لمعه
عشان يكون شكلك طبيعي وسمبل
اول بلشر اخترته هو الي ع اليمين من فلومار رقم 3
لونه بنك مات مافي لمعه طبيعي ع الوجه مره
محلات فلومار النخيل مول حياه مول و بانوراما مول
سعره 17 ريال
.
البلشر الثاني من no7 اسمه pink blush
نفس الشي مات وناااعم مره ع البشره
تحصلونه بالصيدليات
وناسيه سعره للاسف
.
صوره اوضح للالون
مره احبهم لشي بسيط مابي شكلي يكون اوفر
.
نجي للعيون
اكثر ماسكرا احبها للاستخدام اليومي ماتطيح الرموش وتعطي كثاقه وطول
هي ماسكرا فوليوم مليون لاشز من لوريال
عموما لوريال كل ماسكراتهم بطله وهذا النوع غالبا مخلص اذا ماحصلتيه خذي اي نوع
وبتكون نفس النتيجه
.
وبالمكياج اليومي انا مااحبذ الايلاينر افضل بدون ايلانير
بس عشان تعطين عيونك تحديد بسيط ومايكون واضح
احط كحل بني على حد الرموش من فوق ومن تحت
مرره يجمل العين ومايبين متكلف ابد
الكحل من ريفلون افضل كحل جربته بني
لانه كريمي فا يمشي معك ع العين
.
اخر الشي الروج
افضل محدد وروج احطهم سوا ويعطوني نتيجه بطله
هو محدد من ميك اب فورايفر رقمه c1
وروج ماك اسمه بريف
يعطيك لون ب ط ل
يسطل يسطل
مو بس بالصباح احطه اي وقت
لانه مناسب مره
عموما محدد ميك اب فورايفر هذي الدرجه لو تحطينها لحالها تكفي
جميله جدا
.
وبس بالنهايه ان شاء الله استفدتوا
واتمنى مانشوف رموش واصله لراسك
ولا خط الكونتور اشوفه وانتي طالعه من اللفت
ولا هايلايت يرهش
ولا روج عنابي
ولا ايشدو يلمع
ولا اي شي مزعج للعين الصباح
كل ماصرتي سيمبل وطبيعيه اكثر
زادت جاذبيتك وزاد قبولك اكثر
.
.
